روتين عملي لشعر صحي

مشهد جوليا روبوتس في فيلم My Bestfriends Wedding و هي حاطة ١٠ كيلو مايونيز في شعرها مش بيفارقني كل مافكر اني محتاجة اهتم بشعري اكتر. بالنسبالي المشهد ده كابوس. فكرة اني احط حاجة ملزقة او ريحتها نفاذة في شعري ببساطة مش منطقية او عملية.

وبعد سنين تجارب و قراية، توصلت لشوية حاجات عملية و سهلة وبسيطة نقدر نحافظ بيها علي شعرنا ونغذية.

١- اولا: جمال شعرك يبدأ من الداخل

طول عمري فاكرة ان عشان شعري يتغذي يبقي لازم احط عليه حاجات من بره واكتشفت ان احسن تغذية للشعر هي في الحقيقة هتيجي من الاكل اللي بنستهلكة. بس برده ده مش معناه اني هاقولك ناكل افوكادو وسالمون ونشرب شربة الجرجير بالجنزبيل وبذور الكتان المتين.

الموضوع ابسط من كده. محتاجين بروتين وبيوتين و فيتامين سي اللي بيساعد في انتاج الكولاجين و حديد و زنك وده موجود في البيض والفواكة زي الفراولة والبرتقال و السبانخ و البطاطا و المكسرات و الفول… من الاخر كل الحاجات اللي ماما بتعيط عشان ناكلها. لو بناكل اكل متنوع فيه بروتين وخضار وفاكهة يبقي احنا كده تمام.

٢- ثانيا: اختيار الشامبو المناسب مش بس لشعرك بس كمان لفروة راس نظيفة وصحية

موضة ان احنا منغسلش شعرنا بالشامبو غلط كبير لان كده بنخلي الممنتجات و الملوثات والزيوت تتراكم علي فروة الراس وتسبب قشرة. المهم نختار نوع الشامبو المناسب لينا وده بيجي بالتجربة. مفيش احلي من احساس وريحة الشعر المنعشة بعد غسيلة.

٣ـ ثالثا: مش هاقولك نعمل ماسكات كل اسبوع و نخصص يوم ننقع شعرنا في زيوت و ننام بيه لان ده حل غير عملي بالمرة بالنسبالي. انا لقيت البديل في عمل حمام الكريم ده اثناء الاستحمام. تاني هنجرب انواع بلسم مختلفة لغاية ماتوصلي للنوع اللي هيديلك افضل نتيجة. الحقيقة انا باستهلك كميات كبيرة من البلسم، باحط كمية كبيرة علي الجذور والاطراف و باقسم شعري لاربع خصلات و بادلك كل خصلة بالبلسم كويس و اتاكد انه دخل كل مللي من شعري وبالمه و اكمل الشاور بتاعي و اغسله بعد ١٠ دقايق. لو حاسه شعري ناشف شويه باخد فوطه صغيرة معايا و اغسلها بمية سخنة واعصرها والف شعري بيها في الدش لمدة العشر دقايق عشان تساعد في تفتيح المسام و الشعره تستفيد اكتر من البلسم.

٤- رابعا: بعد الغسيل، هنحط منتج واحد، ممكن خليط حماية الشعر من الحرارة او اي سيرم ولو معندكيش ممكن كام نقطة اي زيت علي الاطراف اولا وبعدين الجذور عشان تنيم الهيشان. ممكن برده نحط شوية بلسم في ازازة بخاخ و نخففه بمية ونستعمله. الفكرة ان في منتج يحمي الشعر من الحرارة ويرطبه في نفس الوقت ويديه لمعه صحيه.

A woman combing her hair, while she looks at a mirror

٥- خامسا: خليكي زكية و اعملي قصة شعر تحمي بيها شعرك. يعني مثلا متعمليش قصة bangs لو شعرك ناشف و مجعد من القصة لان ده معناه انك هتحتاجي تستعملي حرارة كتير لفرد القصة كل يوم و كل خروجة. لازم كل بنت يبقي عندها طريقة styling لشعرها في حالته الطبيعية وتكون بتحبها وتقدر تخرج بيها اي مكان حتي لو مناسبة مهمة.

Smilling woman with a yellow jacket at a blue background

٦- سادسا واخيرا: الصحة النفسية. من اكتر الحاجات اللي بتأثر علي شعرنا هي القلق والعصبية وزيادة التفكير. وللاسف مفيش منتج او اكل بيقدر يتغلب علي ده غير اننا نبدأ بخطوات صغيرة وبسيطة نقدر نسيطر بيها علي طريقة تفكيرنا. مش سهل ان احنا نغير من شخصياتنا بس اول خطوة ان احنا يكون عندنا وعي وادراك لمشاعرنا السلبية والخطوة التانية ان ناخد وقت نكلم بيها نفسنا زي مابنتكلم مع صحباتنا بالضبط ونهديها عشان نتجاوز اي قلق ونحافظ علي صحتنا النفسية وبالتالي علي جمال شعرنا.